Neges o’r Maer

Rwy’n falch o gael fy ailethol i wasanaethu fel Maer y Dref ar gyfer 2024/25.  Fy elusen am y flwyddyn fydd Alzheimer’s Cymru sy’n cefnogi dioddefwyr a’u teuluoedd. Dros y blynyddoedd mae Meiri’r Cyngor Dref wedi codi dros £50,000 ar gyfer elusennau lleol. Y prif ddigwyddiad codi arian oedd y casgliad stryd yn yr arddangosfa tân gwyllt flynyddol yng Nghastell Caerffili.  Yn anffodus, mae’r digwyddiad hwn wedi cael ei atal am gyfnod o flynyddoedd, yn gyntaf oherwydd y pandemig ac yn fwy diweddar oherwydd gwaith adeiladu a chadwraeth yn y Castell.  Ni fydd arddangosfa tân gwyllt yn 2024.

Mae yna lawer o wahanol grwpiau yn y dref – yr ifanc, yr henoed, anabl, cymdeithasol a chwaraeon, diddordebau a hobïau arbennig – i gyd ag anghenion gwahanol. Byddaf yn hapus i dderbyn unrhyw awgrymiadau yr hoffech eu gwneud am waith y Cyngor Dref, neu wybodaeth yr hoffech ei gweld ar y wefan.

Mae’r Cyngor Dref yn cyfarfod yn fisol (ac eithrio Awst a Rhagfyr) ac mae croeso i aelodau o’r cyhoedd fynychu bob amser. Mae cyfarfodydd Cyngor Dref bellach yn aml-leoliad sy’n golygu y gallwch fynychu o bell drwy’r rhyngrwyd neu mewn person yng Nghanolfan Gymunedol y Twyn. Os oes mater penodol ar yr agenda yr hoffech siarad arno, gellir trefnu hyn trwy roi hysbysiad i Glerc y Dref.  Bydd angen i chi hefyd gysylltu â Chlerc y Dref ychydig ddyddiau cyn cyfarfod i gael y ddolen gwahoddiad mynediad o bell.

Os hoffech i mi fynychu eich sefydliad i nodi achlysur arbennig neu gyflwyno rhywbeth, cysylltwch â Chlerc y Dref. Gallwch ddefnyddio’r Ffurflen Ymholiad Cyswllt i anfon eich gwahoddiad.

Cafodd y pandemig effaith bellgyrhaeddol ar siopau, busnesau, teuluoedd ac unigolion, ysgolion ac addysg, hamdden, chwaraeon a gweithgareddau cymunedol yn y dref, a nawr mae her barhaus costau byw. Bydd angen cynnal yr ymdrechion cymunedol aruthrol ledled y dref i gefnogi’r rhai sy’n agored i niwed a’r mwyaf mewn angen oherwydd yn anffodus bydd costau byw yn argyfwng parhaus i lawer o deuluoedd.

Mike Prew